上星期介紹咗橫跨俄羅斯北部嘅東北航道，今個星期就要介紹下加拿大北部海域嘅西北航道。同東北航道一樣，以前有唔少航海家都想探索呢條航道，藉此打通一條從歐洲去亞洲嘅新航道，但唔少都失敗收場，當中最出名嘅就係英國冒險家富蘭克林同佢嘅探險隊。

約翰·富蘭克林本身係一名軍人，同時佢亦係北極探險家，當時佢獲得英國海軍資助，响1845年帶同133名船員連同兩艘船去探索西北航道，但當船隊離開格陵蘭後就音訊全無。

探險隊失踪引起英國國內一陣熱議，因為富蘭克林今次探索之旅準備充足，富蘭克林嘅夫人同英國海軍出重酬俾搵到探險隊下落嘅人。一時間，英國同美國都有探險隊出發去搵富蘭克林探險隊。最終，响1850年夏天，有搜尋者首次發現富蘭克林探險隊嘅遺物，就係三位响1846年死亡嘅船員墓碑，但就無其他線索。直至1859年，一隊探險隊响威廉王島上嘅石堆中搵到富蘭克林副手所寫嘅文件。呢份文件記錄咗原來船隊响1846年9月開始就被困冰中，富蘭克林亦响1847年6月11日去世，到咗1848年4月22日全員決定棄船向南求生，但所有船員最終响飢寒或疾病當中而死去。

每次睇到呢啲航海歷史，都覺得以前嘅航海家真係好有勇氣。